Ka rreth një muaj që është shtruar.
Mirëpo, për kaq pak kohë, asfalti në fshatin Shtupel të Klinës ka ardhur në gjendje të mjerueshme.
E papranueshme cilësia e kësaj rruge është për opozitën e kësaj komune.
“Për këtë rrugë dhe disa rrugë që shkojnë deri në oborret e shtëpive, janë shpenzuar diku rreth 300 mijë euro nga buxheti komunal i Klinës. Prandaj, cilësia kaq e dobët dhe kjo shumë e parave paraqet njëfarë shpërdorimi të parasë publike”, tha zëdhënësi i PDK-së në Klinë, Naim Musliu.
Për këtë, PDK-ja paralajmëroi se do t’iu drejtohen edhe organeve të drejtësisë.
Përkundër kësaj, as banorët nuk reaguan përpara kamerës.
Për ngurrimin e banorëve, opozita atje ka një shpjegim.
“Dikush nga komuna i ka kërcënuar banorët këtu që ata të mos flasin, të mos shprehen, të mos prononcohen, për arsye se gjatë rregullimit të kësaj rruge është duke u kryer në të njëjtën kohë edhe projekti i kanalizimit të fshatit dhe ata kanë kërcënuar me ndërprerjen e punimeve, nëse dikush nga banorët prononcohen për media. Dhe kjo është shqetësuese”, tha Musliu.
Komuna e Klinës në një përgjigje me shkrim, ka thënë se për punimet në fjalë ende nuk është bërë pranimi teknik, për çka çdo rregullim shtesë do të bëhet nga operatori ekonomik, pa para shtesë nga komuna.
“Pas asfaltimit të rrugëve në fshatin Shtupel, aty ka filluar puna për shtrirjen e rrjetit të kanalizimit në një segment tjetër. Gjatë punimeve dhe bartjes së makinerive të rënda është shkaktuar edhe dëmtimi i një pjese segmentit rrugor. Vlera e dëmit është rreth 2 080 euro. Kontrata në fjalë është kontratë dyvjeçare dhe pranimi teknik i punëve ende nuk është bërë. Projekti e ka sigurimin e punëve andaj rregullimet do të bëhen së shpejti dhe të gjitha shpenzimet do të mbulohen nga operatori ekonomik, asnjë kosto shtesë nuk do të ketë komuna”, tha këshilltari politik në zyrën e kryetarit, Mirsad Dakaj.
Shtrimi i rrugëve të fshatrave të Klinës, llogaritet të jenë pjesë e investimeve kapitale.
