Konsiderimi nga Gjermania për të dërguar trupa në Ukrainë si pjesë e një marrëveshjeje paqeje me Rusinë ka ndezur debat në skenën politike gjermane, pasi opozita kundërshtoj fuqishëm idenë.
Partia e ekstremit të djathtë Alternativa për Gjermaninë (AfD), e cila kryeson në sondazhet e fundit, ka kritikuar ashpër planin e aleancës konservatore CDU/CSU të kancelarit Friedrich Merz për të shqyrtuar dërgimin e trupave gjermane në Ukrainë në kuadër të një force të përbashkët evropiane.
“Skifterët në CDU mezi presin të dërgojnë përsëri ushtarë gjermanë në zona lufte të huaja”, shkroi në rrjetet sociale bashkëkryetarja e AfD-së, Alice Weidel, duke paralajmëruar kundër një hapi të tillë “të papërgjegjshëm” që sipas saj mund të sjellë pasoja “të rrezikshme” për Gjermaninë.
Nga ana tjetër, Partia Socialiste e Majtë ka shprehur gjithashtu kundërshtimin e saj ndaj vendosjes së trupave gjermane në Ukrainë si pjesë e një nisme të NATO-s, duke propozuar një qasje alternative përmes një misioni paqeruajtës të udhëhequr nga Kombet e Bashkuara, trensmeton Anadolu.
“Ukraina ka nevojë urgjente për garanci konkrete sigurie në rast të një marrëveshjeje paqeje me Rusinë. Megjithatë, këto duhet të vendosen dhe zbatohen absolutisht brenda kornizës së Kombeve të Bashkuara”, deklaroi bashkëkryetari i Partisë së Majtë, Jan van Aken.
“Ideja se garancitë e sigurisë mund të ekzistojnë vetëm me ushtarë të NATO-s në kufirin ruso-ukrainas është e gabuar dhe e rrezikshme”, shtoi ai, duke përmendur raste nga historia ku tensionet kufitare kanë përshkallëzuar në konflikte të mëdha.
Pas takimeve me Presidentin amerikan Donald Trump dhe udhëheqës të tjerë evropianë të hënën, kancelari gjerman Friedrich Merz u shpreh i gatshëm të shqyrtojë pjesëmarrjen e Gjermanisë në një mision të mundshëm paqeruajtës në Ukrainë.
Merz nënvizoi se Gjermania ka “një përgjegjësi të madhe” për të kontribuar në këto përpjekje, duke theksuar se vendimi përfundimtar do të merret në konsultim me partnerët evropianë dhe qeverinë gjermane.
“Është absolutisht e qartë se e gjithë Evropa duhet të marrë pjesë. Në fund të fundit, kjo nuk ka të bëjë vetëm me territorin e Ukrainës; ka të bëjë me rendin politik të Evropës”, tha ai.
