Mjeku kujdestar në Spitalin e Ferizajt, Sefedin Fazliu, ka dhënë detaje të reja për gjendjen shëndetësore të 15-vjeçarit që u plagos sot në Qendrën për Punë Sociale në Ferizaj.
Ai tha se 15-vjeçari ka qenë i plagosur në parakrahun e djathtë, ku në radiografi është vërtetuar se i njëjti e ka pasur një plumb në plagë.
15-vjeçari u plagos nga bashkëshorti i motrës së tij, ku i njëjti la të vdekur edhe 21-vjeçaren.
Fazliu ka bërë të ditur se i plagosuri është duke u trajtuar në Repartin e Ortopedisë.
“Është pranuar në Repartin e Ortopedisë, policia ka qenë pak më herët këtu për ta marrë deklaratën e ti rreth ngjarjes që ka ndodh dhe prapë do të sjellët në repart. Realisht shërbimi i urgjencës i Komunës së Ferizajt ka dalë në vendin e ngjarjes, ku aty ka konstatuar se një paciente femër nuk ka shenja jete dhe ka njoftuar shërbimin policor, po ashtu edhe Mjekësinë Ligjore, e cila e tërhoqi viktimën nga vendi i ngjarjes. Pacienti që është sjell këtu te ne, pas marrjes së trajtimit është pranuar në Repartin e Ortopedisë”, deklaroi ai./teve1.info/
