Gjashtë persona janë arrestuar si të dyshuar për shitblerje të substancave narkotike në rajonin e Prishtinës, ka njoftuar Policia e Kosovës.
Sipas njoftimit, arrestimi i të dyshuarve është bërë gjatë operacionit policor “LUGU” i udhëhequr nga Drejtoria për Hetimin e Trafikimit me Narkotikë, me mbështetje nga Njësia Speciale Operative, njësia K9, teknikë kriminalistike dhe njësi patrulluese.
“Me datën 06.08.2025 rreth orës 12:00 nën autorizimin e Prokurorisë Themelore dhe me urdhëresë të Gjykatës në Prishtinë, është zbatuar plani operativ ku janë zhvilluar kontrolle në tetë lokacione (shtëpi, banesa dhe objekte përcjellëse), ku me urdhër të prokurorit është mbyllur edhe një lokal (free shop)”, thuhet në njoftim.
Gjatë bastisjes, si prova materiale janë sekuestruar: 300 gramë kokainë (vlerë rreth 18 mijë euro), mbi 13 mijë euro, 2 DVR, pesë vetura me targa vendore dhe prova të tjera.
Ndërkaq, të dyshuarit janë shoqëruar për intervistim në prezencë të avokatëve mbrojtës dhe me vendim të prokurorit të shtetit janë ndaluar për 48 orë.
