Policia e Kosovës ka zhvilluar një operacion të gjerë policor në komunat e Shtimes, Lipjanit dhe Drenasit, që ka përfunduar me arrestimin e pesë personave të dyshuar për armëmbajtje pa leje dhe përfshirje në veprime të tjera të kundërligjshme që lidhen me armët dhe materialet plasëse.
Sipas njoftimit zyrtar të Policisë së Kosovës, operacioni është ndërmarrë nga Drejtoria për Hetimin e Krimit të Organizuar dhe Krimeve të Rënda, në bashkëpunim me prokurorinë kompetente.
“Operacioni policor është zhvilluar pas dyshimeve të bazuara për përfshirjen e të dyshuarve në veprat penale ‘importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse’ nga neni 364 i KPRK-së, dhe ‘mbajtja në pronësi, kontroll ose posedim të paautorizuar të armëve’ nga neni 366 i KPRK-së,” thuhet në komunikatën e Policisë.
Gjatë operacionit janë kontrolluar pesë lokacione të ndryshme, përfshirë shtëpitë dhe objektet përcjellëse të personave të dyshuar. Si rezultat, janë gjetur dhe sekuestruar:
1 pushkë automatike AK-47,
1 pushkë e gjatë me dylbi,
1 pushkë gjuetie,
1 revole,
2 pushkë ajrore,
116 fishekë të kalibrave të ndryshëm,
8 fishekë me gaz,
5 telefona mobil.
Pas intervistimit të të dyshuarve nga hetuesit policorë, me vendim të prokurorit të çështjes, të pesë personat e arrestuar janë dërguar në qendrën e mbajtjes për 48 orë.
“Policia e Kosovës mbetet e përkushtuar në parandalimin dhe luftimin e veprimtarive të paligjshme që cenojnë sigurinë publike dhe rendin kushtetues,” përfundon komunikata.
