Policia e Kosovës ka sekuestruar një automjet Skoda Octavia me targa të Serbisë, i pajisur me kamera profesionale dhe sistem GPRS, i cili rezulton të ketë hyrë në Kosovë qysh në vitin 2022 dhe ka qëndruar në kundërshtim me ligjin.
Polica bën të ditur se automjeti është zbuluar më 5 shtator në rrugën “Knjaz Milos” në Mitrovicën e Veriut dhe pas verifikimeve është dërguar në stacionin policor.
Hetimet kanë nxjerrë se vetura ishte pronë e “Narodna Banka Srbije”, e përdorur më herët për transportimin e parave nga Serbia në Kosovë.
Gjatë kontrollit të detajuar, policia gjeti dy kamera të montuara, një DVR dhe një ekran monitorimi, të cilat sipas Ligjit për Mbrojtjen e të Dhënave Personale janë pajisje të kundërligjshme.
Për këtë arsye, Policia thotë se në vendngjarje është ftuar edhe Agjencia për Informim dhe Privatësi (AIP), e cila i ka konfiskuar pajisjet për procedura të mëtejme ligjore.
