Pas 20 vitesh në parket, një nga emrat më të njohur të hendbollit kosovar, Oltion Beshiri, ka njoftuar tërheqjen nga sporti aktiv.
Kapiteni i KH Prishtina dhe ish-përfaqësuesi i Kosovës, përmes një mesazhi emocionues, falënderoi familjen, bashkëlojtarët, trajnerët dhe tifozët për mbështetjen e dhënë gjatë gjithë karrierës.
“Prishtinës i dhashë gjithçka: trupin, mendjen dhe shpirtin… Tani shihemi në tribuna”, shkroi Beshiri, duke prekur zemrat e shumë adhuruesve të sportit.
I rritur me topin e hendbollit në duar, Beshiri u formua nën udhëheqjen e babait dhe trajnerit të tij të parë, Nazmi Beshiri, duke u bërë një figurë kyçe në zhvillimin e hendbollit në kryeqytet dhe më gjerë.
Gjatë karrierës së tij, ai përfaqësoi me dinjitet Kombëtaren e Kosovës, duke e cilësuar atë përvojë si “ndjenjën më të fuqishme që mund të përjetosh si sportist”.
Përmes përkushtimit, disiplinës dhe dashurisë për lojën, Oltion Beshiri la gjurmë të pashlyeshme në historinë e klubit dhe hendbollit kosovar.
