Sanksionet e Kombeve të Bashkuara ndaj Iranit për shkak të programit të tij bërthamor u rivendosën të dielën, duke e vënë Teheranin nën presion të ri.
Në Asamblenë e Përgjithshme të OKB-së këtë javë në Nju Jork, Presidenti iranian Masoud Pezeshkian dhe Ministri i Jashtëm, Abbas Araghchi u përpoqën të bënin një përpjekje diplomatike në minutën e fundit për të ndaluar sanksionet.
Megjithatë, udhëheqësi suprem i Iranit, Ajatollah Ali Khamenei, i kufizoi përpjekjet e tyre duke e përshkruar diplomacinë me Shtetet e Bashkuara si një “rrugë pa krye”.
Ndërkohë, përpjekjet e Kinës dhe Rusisë për të ndaluar sanksionet dështuan të premten, raporton AP.
Një afat 30-ditor për sanksionet filloi kur Franca, Gjermania dhe Mbretëria e Bashkuar më 28 gusht deklaruan se Irani nuk po i përmbahej marrëveshjes bërthamore të vitit 2015 me fuqitë botërore.
Teherani ka argumentuar pa sukses se marrëveshja u anulua nga tërheqja e njëanshme e Shteteve të Bashkuara nga ajo në vitin 2018, nën administratën e parë të Presidentit Donald Trump.
Që atëherë, Irani ka kufizuar rëndë inspektimet e kërkuara nga mbikëqyrësi bërthamor i OKB-së, Agjencia Ndërkombëtare e Energjisë Atomike, veçanërisht pas luftës 12-ditore që Izraeli nisi kundër Iranit në qershor.
Në atë luftë si SHBA-të ashtu edhe Izraeli bombarduan lokacionet kryesore bërthamore iraniane .
