Bastisjet ushtarake nga ushtria izraelite kanë rezultuar në ndalimin e të paktën 35 palestinezëve, përfshirë fëmijë dhe ish-të burgosur, në zona të tilla si Nablus, Salfit, Qalqilya, Jenin, Tulkarem, Hebron dhe Betlehem.
Ky informacion u konfirmua nga Komisioni i Çështjeve të të Paraburgosurve dhe Shoqata Palestineze e të Burgosurve në një deklaratë të përbashkët.
Zyra e Komisionerit të Lartë të OKB-së për të Drejtat e Njeriut (OHCHR) ka zbuluar një rritje të ndjeshme të sulmeve kundër palestinezëve në Bregun Perëndimor të pushtuar, përfshirë Jerusalemin Lindor.
Thameen al-Kheetan, zëdhënës i Zyrës së Komisionerit të Lartë të OKB-së për të Drejtat e Njeriut, u tha gazetarëve në Gjenevë se “kolonët izraelitë dhe forcat e sigurisë kanë intensifikuar vrasjet, sulmet dhe ngacmimet e palestinezëve në Bregun Perëndimor të pushtuar, përfshirë Jerusalemin Lindor, në javët e fundit”.
Sipas OHCHR, kolonët kanë kryer 757 sulme ndaj palestinezëve ose pronave të tyre që nga janari, duke shënuar një rritje prej 13 përqind krahasuar me të njëjtën periudhë të vitit të kaluar, raporton Al Jazeera.
Organizatat e të drejtave të njeriut vlerësojnë se rreth 10,800 palestinezë mbahen aktualisht nga Izraeli, përfshirë 50 gra, 450 fëmijë dhe 3,629 të paraburgosur që mbahen pa gjyq ose pa akuza sipas politikës kontraverse të paraburgimit administrativ të Izraelit.
Që nga tetori i vitit 2023, mbi 18,000 palestinezë janë ndaluar nga forcat izraelite në Bregun Perëndimor, sipas burimeve palestineze. Kjo shifër nuk përfshin mijëra palestinezë të tjerë të arrestuar në Gaza që nga fillimi i konfliktit.
Ministria Palestineze e Shëndetësisë ka raportuar se që nga fillimi i fushatës ushtarake të Izraelit në Rripin e Gazës, të paktën 998 palestinezë janë vrarë dhe mbi 7,000 të tjerë janë plagosur në Bregun Perëndimor si pasojë e dhunës së forcave izraelite dhe kolonëve të paligjshëm.
