Më shumë se 50,000 civilë janë zhvendosur nga tre shtetet e Kordofanit drejt Sudanit Jugor për shkak të përkeqësimit të situatës së sigurisë, njoftoi të enjten Organizata Ndërkombëtare për Migracionin (IOM).
Sipas agjencisë së OKB-së, 50,445 persona u larguan nga rajoni midis 25 tetorit dhe 17 dhjetorit, ndërsa ekipet e IOM-it dokumentuan 39 incidente që shkaktuan valë zhvendosjeje gjatë kësaj periudhe.
IOM bëri të ditur se rreth 40,350 persona u zhvendosën nga gjashtë lokalitete në Kordofanin e Veriut, 9,845 nga nëntë lokalitete në Kordofanin e Jugut dhe 250 nga Kordofani Perëndimor, transmeton Anadolu.
Autoritetet sudaneze, OKB-ja dhe organizata të të drejtave të njeriut kanë akuzuar Forcat paraushtarake të Mbështetjes së Shpejtë (RSF) për abuzime dhe përdhunime në disa qytete të rajonit. RSF i ka mohuar akuzat për shënjestrim të civilëve, megjithëse ka pranuar herë pas here “shkelje” në Darfur dhe ka deklaruar se ka nisur hetime.
RSF kontrollon pesë shtetet e Darfurit, përveç disa zonave në Darfurin e Veriut që mbeten nën kontrollin e ushtrisë. Ushtria mban shumicën e territorit në 13 shtetet e tjera, përfshirë kryeqytetin Khartum.
Konflikti mes ushtrisë sudaneze dhe RSF-së, që shpërtheu në prill 2023, ka shkaktuar mijëra viktima dhe ka zhvendosur miliona njerëz.
