Këshilli i Sigurimit i Kombeve të Bashkuara ka planifikuar një votim të mërkurën pasdite mbi një rezolutë që kërkon një armëpushim të menjëhershëm, të pakushtëzuar dhe të përhershëm në Rripin e Gazës, e cila do të duhej të respektohej nga të gjitha palët e përfshira në konflikt.
Sipas diplomatëve të OKB-së, ekziston një pritshmëri e lartë që Shtetet e Bashkuara të vendosin veton ndaj kësaj nisme.
Rezoluta është hartuar nga 10 vendet e zgjedhura anëtare të përkohshme të këshillit, të cilat shërbejnë me mandate dyvjeçare. Ajo rithekson kërkesën për lirimin e të gjithë pengjeve të mbajtura nga Hamasi pas sulmit të 7 tetorit 2023 ndaj jugut të Izraelit.
Duke e përshkruar situatën humanitare në Gaza si “katastrofike”, dokumenti i propozuar kërkon heqjen e menjëhershme dhe të pakushtëzuar të të gjitha pengesave për hyrjen e ndihmave humanitare, si dhe garantimin e një shpërndarjeje të sigurt dhe të pandërprerë të ndihmave në shkallë të gjerë, përfshirë nga OKB-ja dhe organizatat partnere.
Votimi zhvillohet në një kohë kur ndihmat po shpërndahen përmes pikave të kontrolluara nga ushtria izraelite, në kuadër të një sistemi të mbështetur nga SHBA-të i projektuar për siç thonë ata, anashkalimin e kontrollit të Hamasit.
Megjithatë, OKB-ja ka refuzuar këtë qasje, duke deklaruar se ajo nuk adreson krizën humanitare në përkeqësim, i jep Izraelit kontroll të tepruar mbi ndihmat, të cilën mund ta përdorë si armë dhe për zhvendosjen e palestinezëve, dhe bie ndesh me parimet humanitare të neutralitetit, paanshmërisë dhe pavarësisë.
Projektrezoluta thekson gjithashtu nevojën për rivendosjen e të gjitha shërbimeve humanitare thelbësore në përputhje me të drejtën ndërkombëtare dhe rezolutat ekzistuese të OKB-së, raporton AP.
Diplomatë nga disa vende anëtare, që folën në kushte anonimiteti për shkak të ndjeshmërisë së diskutimeve, shprehën bindjen se SHBA do të vërë veton ndaj rezolutës, ashtu siç ka bërë edhe në të kaluarën.
Për momentin, Misioni i SHBA-së në OKB nuk ka dhënë koment, ndërsa Misioni i Izraelit nuk ka reaguar ndaj kërkesave për deklaratë.
Aktualisht, rreth 2 milionë banorë në Gaza janë tërësisht të varur nga ndihmat ndërkombëtare, pasi fushata ushtarake izraelite ka shkatërruar pothuajse të gjithë kapacitetin e prodhimit ushqimor në territor.
Izraeli vendosi një bllokadë të plotë më 2 mars, dhe vetëm së fundmi ndihmat kanë nisur të hyjnë sërish në Gaza pas presioneve ndërkombëtare dhe paralajmërimeve për një krizë urie.
Zëdhënësi i OKB-së, Stephane Dujarric, tha të martën se situata në Gaza është dramatike dhe se ndihmat që po dërgohen janë të pamjaftueshme.
“Hyrja e papenguar e ndihmës humanitare në shkallë të gjerë duhet të rivendoset menjëherë,” theksoi Dujarric.
“OKB-së duhet t’i lejohet të veprojë në kushte sigurie dhe në përputhje të plotë me parimet humanitare.”
Që nga tetori 2023, Këshilli i Sigurimit ka votuar për 14 rezoluta që kanë të bëjnë me situatën në Gaza, por vetëm katër janë miratuar.
Në nëntor të kaluar, një tjetër rezolutë e ngjashme që kërkonte armëpushim të përhershëm dhe pa kushte mori mbështetjen e 14 prej 15 anëtarëve, por u bllokua nga SHBA.
