Shefi i çështjeve humanitare të OKB-së, Tom Fletcher ka tërhequr vërejtjen të hënën, duke paralajmëruar për pasojat tragjike të mungesës së ndihmës në Rripin e Gazës.
Fletcher tha se ekziston frika reale që mbi 14,000 foshnja mund të humbasin jetën në 48 orët e ardhshme nëse furnizimet nuk u dorëzohen atyre menjëherë. Ai e përshkroi situatën si një emergjencë humanitare të pashoqe dhe bëri thirrje për një reagim të menjëhershëm nga komuniteti ndërkombëtar.
Sipas tij, megjithëse pesë kamionët kanë kaluar kufirin dhe janë brenda Gazës, ndihmat që mbartin ende nuk kanë arritur në komunitetet që kanë më shumë nevojë. Kamionët janë bllokuar në një zonë të ndërmjetme dhe shpërndarja e furnizimeve po vonohet për shkak të mungesës së sigurisë dhe logjistikës së dobët.
Ndihma e tanishme, megjithëse pozitive, ai e përshkruajti si “Një pikë uji në oqean,” duke nënvizuar se nevojat janë shumë më të mëdha se sa volumi i ndihmës që ka hyrë deri tani.
Por, “testi i vërtetë” e cilëson ai është nëse OKB-ja mund të sigurojë më shumë ndihmë, pas bllokadës 11-javore.
Duke folur për BBC radio 4, ai tha se OKB-ja po “kërkon” që bota “të na mbështesë” në nxitjen e Izraelit për të lejuar më shumë ndihma dhe për të arritur tek njerëzit që “vdesin urie”.
“Këto janë furnizime jetike për mbijetesën e fëmijëve të vegjël që po përballen me urinë ekstreme,” shtoi ai.
