Një grup organizatash të shoqërisë civile në Kosovë kanë reaguar lidhur me raportimet, për si thonë ato, përfshirjen e ambasadores së Kosovës në Norvegji, Nita Luci, në aktivitete të partive politike.
Sipas OJQ-ve, prezenca e ambasadores në një takim të një partie politike mund të krijojë perceptimin e anshmërisë politike dhe bie ndesh me parimin e neutralitetit diplomatik, veçanërisht në prag të zgjedhjeve.
Sipas tyre, ky veprim rrezikon të interpretohet si ndërhyrje në procesin zgjedhor dhe mund të dëmtojë imazhin dhe besueshmërinë e shërbimit diplomatik të Kosovës.
Organizatat theksojnë se audienca kryesore e ambasadorëve duhet të jenë institucionet e shtetit pritës, organizatat joqeveritare, bizneset dhe qytetarët e huaj, duke shtuar se përfshirja në ngjarje partiake është në kundërshtim me praktikat diplomatike dhe parimin e mosndërhyrjes.
“Në aspektin ligjor, sipas Ligjit Nr. 03/L-122 për Shërbimin e Jashtëm të Republikës së Kosovës, çdo ambasador është i detyruar të pezullojë aktivitetet politike gjatë ushtrimit të detyrës diplomatike. Organizatat i bëjnë thirrje Ministrisë së Punëve të Jashtme dhe Diasporës të reagojë menjëherë, të sqarojë rastin dhe të zbatojë ligjin në mënyrë të barabartë, duke shmangur normalizimin e politizimit të diplomacisë”.
Komunikata është mbështetur nga: Instituti i Prishtinës për Studime Politike (PIPS), Instituti për Politika Zhvillimore (INDEP), Instituti EPIK, Lëvizja FOL, Instituti i Kosovës për Drejtësi (IKD), Youth Initiative for Human Rights Kosova (YIHR KS), Instituti për Politika Sociale Musine Kokalari, Qendra e Kosovës për Studime të Sigurisë (QKSS) dhe Instituti Demokratik i Kosovës (KDI).
