Oda Ekonomike e Kosovës (OEK) ka reaguar ndaj deklarimeve të ministres në detyrë të Ekonomisë, Artane Rizvanolli, e cila e ka përmendur Odën si “akter politik opozitar” dhe ka sugjeruar se ajo ka dekurajuar bizneset të aplikojnë për skemat e granteve.
Në reagimin e saj, OEK ka cilësuar deklaratat e Rizvanollit si të pabazuara, të dëmshme dhe të papranueshme, duke theksuar se institucioni për dekada ka qenë partner konstruktiv i të gjitha qeverive, pa dallim politik.
OEK paralajmëroi se do të ndërmarrë veprime ligjore nëse ministrja nuk paraqet prova.
“Oda Ekonomike e Kosovës në mënyrë të vazhdueshme i ka inkurajuar bizneset të aplikojnë në çdo skemë mbështetëse, përfshirë ato për grante, duke i konsideruar si instrumente të rëndësishme për zhvillimin ekonomik dhe rritjen e konkurrueshmërisë. Për vite me radhë, OEK ka qenë promotori kryesor i informimit të bizneseve për mundësi financiare, teknike dhe institucionale”, thuhet në reagim.
Sipas OEK-ut, deklarimet e Rizvanollit synojnë të njollosin institucionin.
“Çdo pretendim i kundërt është i pavërtetë dhe tenton të dëmtojë reputacionin tonë. Fatkeqësisht, suksesi i OEK-ut në mbështetje të zhvillimit ekonomik po vazhdon të pengojë disa akterë që, në mungesë të argumenteve, po përdorin diskurs të pavërtetë”, thuhet më tej.
OEK i ka dhënë afat ministres Rizvanolli deri më 08 dhjetor 2025 për të paraqitur prova të qarta dhe të verifikueshme lidhur me pretendimet se Oda ka “ndikuar” në ndonjë kompani për të mos aplikuar për grante.
Në reagim shtohet gjithashtu se ish-ministrja Rizvanolli do të duhet të japë llogari edhe për dëmet e shkaktuara bizneseve nga mënyra e njëanshme dhe e papërgatitur e futjes së tyre në tregun e lirë të energjisë — proces që, sipas OEK-ut, ka krijuar vështirësi serioze financiare dhe operacionale për shumë kompani vendore.
