Vendet anëtare të Organizatës Botërore të Shëndetësisë (OBSH) miratuan një marrëveshje për të përmirësuar parandalimin, përgatitjen dhe reagimin ndaj pandemive të ardhshme, pas përvojës së COVID-19.
Marrëveshja, e hartuar gjatë tre viteve dhe miratuar pa kundërshtime në asamblenë vjetore në Gjenevë, garanton ndarjen e mostrave të viruseve dhe shpërndarjen e deri në 20% të testeve, ilaçeve dhe vaksinave për vendet më të varfra.
Drejtori i OBSH-së, Tedros Adhanom Ghebreyesus, e quajti marrëveshjen “historike”, ndërsa ministrja e shëndetësisë së Namibisë, Esperance Luvindao, theksoi rëndësinë e bashkëpunimit global, raporton AP.
Efektiviteti i traktatit vihet në pikëpyetje pasi Shtetet e Bashkuara – të cilat investuan miliarda në punë të shpejtë nga kompanitë farmaceutike për të zhvilluar vaksinat kundër COVID-19 – nuk do të marrin pjesë dhe sepse vendet nuk përballen me penalitete nëse e injorojnë atë, një problem i zakonshëm në të drejtën ndërkombëtare.
SHBA-të, tradicionalisht donatori kryesor i agjencisë shëndetësore të OKB-së, nuk ishin pjesë e fazave përfundimtare të procesit të marrëveshjes pasi administrata Trump njoftoi një tërheqje të SHBA-së nga OBSH-ja dhe financimin e agjencisë në janar.
