Veriu vazhdon të jetë në perimetrin e situatës së ndjeshme.
Kështu e vlerësojnë gjendjen atje edhe diplomatë të nivelit të lartë.
Së fundi vetë Ndihmëssekretari amerikan i Shtetit për Çështjet Evropiane dhe Euroaziatike, James O’Brien, tha se veriu i Kosovës dhe kërcënimet për shkëputjen e një pjese të Bosnje e Hercegovinës, janë rreziqet kryesore për sigurinë në Ballkanin Perëndimor.
Andaj diplomati amerikan i ka bërë thirrje Kosovës dhe Serbisë që ta shfrytëzojnë procesin e dialogut për t’i përmirësuar marrëdhëniet.
“Jam i inkurajuar gjithashtu që ka pasur bashkëpunim të mirë me autoritetet serbe, me autoritetet e Kosovës, në përpjekje për t’i trajtuar rreziqet e dhunës dhe të rritjes së përplasjeve në veri të Kosovës. Mendoj se me këtë kemi një shans për procesin politik, që është dialogu i ndërmjetësuar nga Bashkimi Evropian] plani evropian i rritjes ekonomike dhe gjërat e tjera për t’i trajtuar shkaqet e dhunës”, tha ai.
Se situata e sigurisë në veriun e vendit mund të përshkallëzoj e thotë edhe njohësi i çështjeve politike, Seb Bytyçi.
“Situata në veriun e vendit mund të përshkallëzoj në çdo moment sepse ka infiltrim nga strukturat e sigurisë nga Serbia të cilat mund të urdhërohen nga presidenti i Serbisë, Aleksandar Vuçiq, të shkaktojnë tensione në pjesën veriore të vendit. Pra mund të ketë incidente të tilla siç ishte ajo në Banjskë të Zveçanit më 24 shtator”, tha Bytyçi.
Tutje, Bytyçi i kujton disa deklarata të dhëna nga Vuçiq kur thoshte se po i pret ndryshimet gjeopolitike për të ndërhyrë në Kosovë.
“Presidenti i Serbisë, Aleksandar Vuçiq pat deklaruar se po i pret ndryshimet politike për të ndërhyrë në veriun e Kosovës. Ai është inspiruar nga veprimet e Rusisë më ndërhyrjen ushtarake në Ukrainë”, deklaroi profesori.
Edhe krerët shtetëror të vendit vazhdimisht e kanë theksuar se Kosova është e rrezikuar nga fqinji i saj Serbia.
