Komuna e Obiliqit ka prezantuar sot platformën e re “Alo Komuna”, përmes së cilës synohet të rritet përfshirja e qytetarëve në raportimin e problemeve në hapësirat publike, duke paraparë edhe shpërblime për raportimet e tyre. Kryetari i Obiliqit, Halil Thaçi, ka shpjeguar për KosovaPress mënyrën e funksionimit të platformës dhe klasifikimin e shpërblimeve, varësisht nga rastet e raportuara.
“Kemi krijuar një platformë ku qytetarët tanë do të kenë një qasje të lehtë dhe natyrisht do të kenë kryetari, nënkryetari dhe të gjitha drejtoritë qasje në këtë platformë. Kjo platformë quhet ‘Alo Komuna’ dhe për fokus të veçantë ka raportimin e qytetarëve qoftë për dëmtim të rrugëve, qoftë për çdo kërkesë apo ankesë që ata kanë. Në mes të këtyre kërkesave që ata mund të bëjnë është edhe linku ku ata mund të raportojnë për hedhjen e mbeturinave ku mund të fitojnë shpërblim”, tha ai.
E, kushdo që raporton prishje të rendit në Komunën e Obiliqit do të shpërblehet.
“Ata qytetarë që janë vigjilentë për pastërtinë në Obiliq, ata do të shpërblehen. Çdo raportim të hedhjes së mbeturinave pa vend që e bëjnë qytetarët do të shpërblehen. Shpërblimi është për persona fizik që raportohen duke hedhur mbeturina shpërblimi është 50 euro, ndërsa për personat juridik apo bizneset që hedhin mbeturina sigurisht shpërblimi është 100 euro. Këtë e kemi bërë si stimulin për t’i stimuluar qytetarët që të na ndihmojnë në mbajtjen e pastër të komunës së Obiliqit”, tha Thaçi.
