Nxënësit e paraleleve të katërta të shkollës fillore “Naim Frashëri” në Prishtinë realizuan një vizitë edukative në ambientet e televizionit Tëvë1, ku patën mundësinë të njihen nga afër me punën dhe funksionimin e këtij mediumi të mirënjohur informativ.
Gjatë qëndrimit në televizion, nxënësit vizituan studiot e lajmeve, regjisë, dhomën e montazhit dhe hapësirat e tjera të punës, duke parë nga afër procesin e përgatitjes së emisioneve dhe kronikave televizive.
Ata u informuan për mënyrën se si realizohet një lajm – nga terreni deri në transmetim – si dhe për rolin dhe përgjegjësitë e gazetarëve, kameramanëve dhe stafit teknik.
Kjo vizitë u shndërrua në një përvojë të veçantë dhe frymëzuese për nxënësit, të cilët shfaqën interesim të madh, bënë pyetje dhe u njohën më nga afër me botën e medias dhe komunikimit.
Stafi i shkollës “Naim Frashëri” falënderoi drejtuesit dhe ekipin e Tëvë1 për mikpritjen e ngrohtë, gatishmërinë dhe kohën e ndarë për nxënësit, duke vlerësuar këtë aktivitet si shumë të dobishëm në aspektin edukativ dhe orientues për të rinjtë.
Vizita të tilla mbeten një urë lidhëse mes arsimit dhe medias, duke i ndihmuar fëmijët të kuptojnë më mirë profesionet dhe rëndësinë e informimit të drejtë në shoqëri./teve1.info/
