Nxënësit e shkollave “Zenel Hajdini” dhe “Asim Vokshi” në lagjen “Kodra e Trimave” të Prishtinës, bashkë me prindërit e tyre, kanë dalë sot në protestë.
Ata po kundërshtojnë mësimin tërëditor dhe kushtet e rënda në të cilat zhvillohet procesi arsimor.
Kështu tha në një postim në Facebook, deputeti i Kuvendit të Kosovës nga LVV-ja, Mefail Bajqinovci.
Sipas protestuesve, shkollat përballen me mungesë sigurie, distancë të gjatë për nxënësit, mbingarkesë në orar dhe mungesë të kushteve elementare higjienike.
“Fëmijët po lodhen, prindërit janë të shqetësuar, e Komuna hesht”, ka shkruar Bajqinovci, duke kritikuar qeverisjen komunale të Prishtinës.
Sipas tij, administrata e kryetarit Përparim Rama po e vështirëson jetën edhe të nxënësve.
