Policia e Kosovës ka bërë të ditur se ka pranuar një informacion për një rast në një shkollë në fshatin Xërxë, ku një nxënës dyshohet se kishte hyrë në objektin shkollor me thikë.
Sipas policisë, rasti është raportuar nga një qytetar, ndërsa i dyshuari (i mitur) është shoqëruar në stacion policor për procedura të mëtejshme.
Gjatë veprimeve policore, arma e ftohtë është sekuestruar, ndërsa pas intervistimit i mituri është liruar në procedurë të rregullt me vendim të prokurorit.
“Ankuesi mashkull kosovar, ka raportuar se i dyshuari mashkull i mitur ka hyrë në shkollë me një armë të ftohtë (thikë). I dyshuari është shoqëruar në stacionin policor dhe nga i njëjti është sekuestruar thika dhe pas intervistimit me vendim të prokurorit i dyshuari është liruar në procedurë të rregullt”, thuhet në raportin e PK-së.
