Anëtari i PSD-së, Nol Nushi, ka kritikuar Lidhjen Demokratike të Kosovës dhe ish-presidenten Vjosa Osmani, duke vlerësuar se ndikimi i saj në zgjedhjet parlamentare të 7 qershorit ka qenë i kufizuar.
Sipas Nushit, qytetarët nuk e kanë mbështetur me votë Vjosa Osmanin në nivelin që, sipas tij, pritej nga LDK-ja.
“Qytetari në zgjedhjet e 7 qershorit nuk e shpërbleu me votë Vjosa Osmanin ashtu siç LDK-ja ka pritë. Efekti i Osmanit ishte pothuajse minimal. Në këtë rast vetëm sa e fuqizuan Albin Kurtin, i cili i fitoi zgjedhjet edhe pa Vjosa Osmanin”, ka deklaruar Nushi.
Ai ka shtuar se LDK-ja, sipas tij, nuk ka një shpjegim për elektoratin e saj lidhur me këtë rezultat, ndërsa ka akuzuar edhe kryetarin e LDK-së, Lumir Abdixhiku, dhe Osmanin se po i shërbejnë politikisht kryeministrit në detyrë, Albin Kurti.
Në deklaratën e tij, Nushi ka kritikuar gjithashtu edhe PDK-në dhe LDK-në, duke u bërë thirrje qytetarëve që të mos i mbështesin këto parti.
Në përfundim, Nushi tha se një pjesë e LDK-së po janë satelitë të LVV-së.
“Problemi në LDK është se nuk kanë shpjegim për votuesit e tyre, fatkeqësia jonë qe shpresa e programume te Vjosa dhe Lumiri është se ata janë thjesht disa shërbëtorë, disa paterica të Kurtit. PDK dhe LDK janë më stërkeqet dhe qytetarët duhet të heqin dorë nga ato sa më parë dhe mos të besojnë flukseve siç ishte kjo e fundit Vjosa Osmani. Një pjesë e LDK-së po janë satelitë të LVV-së”, deklaroi Nushi në emisionin “Ditari” në Tëvë1./teve1.info/
