Bashkimi Evropian tashmë i ka vendosur disa sanksione Kosovës për shkak të mospërmbushjes së kërkesave të BE-së për shtensionimin e situatës në veri të vendit.
Anëtari i kryesisë së PDK-së, Adri Nurellari, thotë se Kosova është i vetmi shtet në Evropë që është sanksionuar nga Bashkimi Evropian, madje sipas tij, në mënyrë të agresive, ndërsa foli edhe për “skenarin më të keq për Kosovën”.
Nurellari, vlerëson se situata është shqetësuese. Ai thotë se nga kjo që është krijuar rreth sanksioneve, nuk bëhet fjalë për emër të përveçëm, por për raporte të ngritura mes Shteteve të Bashkuara të Amerikës, Britanisë së Madhe dhe BE-së.
“Izolimi vetëm sa ka nisur, kur vjen puna që vendet që kanë qenë kumbarë të krijimit të shtetit të Kosovës, bëjnë reagime të ashpra dhe bëjnë sanksione të ashpra, pra Kosova në Evropë është i vetmi vend i sanksionuar në mënyrë agresive bashkë me Rusinë, Bjellorusinë dhe Republikën Srpska të Dodikut. Kur vjen kjo situatë është vërtetë shqetësuese. Këtu nuk bëhet fjalë për emra të përveçëm, këtu bëhet fjalë për raporte të ngritura në kuadër të dekadave të bashkëpunimit dhe forcimit të partneritetit tonë me Shtetet e Bashkuara të Amerikës, Britaninë e Madhe dhe Bashkimin Evropian”, tha ai në emisionin “Ditari” në Tëvë1.
Ai thotë se Kurti gjithmonë tërhiqet kur arrin në situatat që shkojnë në buzë të greminës.
“Ajo çfarë po shohim ne, kjo nuk është e shkëputur, nuk është rastësi, por është vazhdimësi e Kurtit që po shkon gjithmonë buzë greminës dhe po tërhiqet. E pamë që shkoi buzë greminës me acarimin e situatës me tabela, pastaj shkoi në Bruksel dhe i pranoi tabelat ilegale. E pamë që shpalli zgjedhje pastaj i tërhoqi, e pamë që arrestoi policin në veri, e mbajtja atje pa proces dhe pastaj kur u vendosen barrikadat u tërhoq”, tha ai.
Më tej Nurellari foli edhe për skenarin që ai e quajti si më të keqin për Kosovën.
Sipas Nurellarit, gjasat janë të mëdha që faktori ndërkombëtar t’ia kufizojë hapësirën kryeministrit të Kosovës, Albin Kurtit, dhe nga kjo KFOR-i mund të kthehet në një status tjetër, jo si është në nivelin e tretë të sigurisë.
“Gjasat janë të mëdha që faktori ndërkombëtar t’ia kufizojë hapësirën Kurtit, dhe frika që kemi ne është që KFOR-i mund të kthehet në një status tjetër, në një situatë dhe në një veprimtari që shkon përtej Kushtetutës së Kosovës dhe kthehet në periudhën para shpalljes së pavarësisë, ku KFOR-i merrte edhe detyra policore. Nuk është më sikurse e parashikon Kushtetuta e Kosovës si nivel i tretë i sigurisë, por do të merrte edhe detyra të patrullimit edhe të organizimit të rendit publik në veri, dhe kjo do të ishte një thyerje ndaj shpalljes së pavarësisë dhe një kthim mbrapa. Duket qartë që i ka shtuar edhe trupat e KFOR-it”, shtoi ai. /teve1.info/
