Deputeti i Partisë Demokratike të Kosovës (PDK), Jakup Nura, ka deklaruar se Lëvizja Vetëvendosje (VV), si partia që doli e para në zgjedhjet e 9 shkurt, nuk ka kontaktuar PDK-në dhe nuk ka paraqitur asnjë ofertë të re për bashkëpunim në lidhje me konstituimin e Kuvendit.
Nura theksoi se PDK ka shqyrtuar mundësinë për të qëndruar në parlament për 48 orë, vetëm për të mundësuar një zgjidhje të shpejtë dhe për të mos bllokuar procesin.
“Partisë fituese i ka takuar dhe dua të besoj që e ka shfrytëzuar këtë kohë që të kontaktojë dhe të bisedojë me partitë tjera. Neve nuk na kanë kontaktuar apo bërë ndonjë ofertë diçka… Ne si Parti Demokratike e kemi shqyrtuar mundësinë të rrimë në parlament 48 orë vetëm t’iu jepet mundësia që sa më shpejtë të zgjidhet ky problem. Këtë radhë do të kemi një angazhim më të madh rreth kohës ose limitit të kohës së vendosjes në propozim të një kandidateje të tyre. Besoj që do të shkojnë më shpejt tani propozimet”, tha Nura.
Të hënën, Gjykata Kushtetuese e publikoi aktgjykimin e plotë për ngërçin politik në vend.
Sipas këtij aktgjykimi brenda 30 ditësh duhet të ndodh konstituimi i Kuvendit të Kosovës dhe emri i kandidatit apo kandidates së propozuar për kryekuvendar nuk mund të votohet më shumë se tri herë.
