Të paktën 80 persona janë vrarë sot nga sulmet izraelite në të gjithë territorin e rrethuar të Gazës, sipas burimeve spitalore për Al Jazeera.
Ndër viktimat janë 57 palestinezë të vrarë në pjesën veriore të Gazës dhe 15 persona që kërkonin ndihma pranë qendrave të shpërndarjes së ndihmave në pjesën veriore të Rafahut, në jug të enklavës.
Kjo shifër e re e viktimave e çon bilancin e përgjithshëm të të vrarëve që nga tetori 2023 në të paktën 56,531 persona, sipas Ministrisë Palestineze të Shëndetësisë. Ndërkohë, numri i të plagosurve ka arritur në 133,642. Në 24 orët e fundit janë raportuar 28 viktima të reja dhe 223 të plagosur.
“Shumë trupa mbeten ende nën rrënoja ose në rrugë, pasi ekipet e shpëtimit nuk kanë mundësi të hyjnë në zonat e goditura,” thuhet në deklaratën e ministrisë, shkruan Al Jazeera.
Izraeli rifilloi ofensivën e tij ushtarake më 18 mars, pas thyerjes së një armëpushimi dhe marrëveshjeje për shkëmbim të të burgosurve që ishte në fuqi që nga janari. Që nga ajo kohë janë vrarë 6,203 persona dhe janë plagosur 21,601 të tjerë.
Në nëntor 2024, Gjykata Ndërkombëtare Penale lëshoi urdhër-arreste për Kryeministrin izraelit Benjamin Netanyahu dhe ish-ministrin e Mbrojtjes Yoav Gallant, duke i akuzuar për krime lufte dhe krime kundër njerëzimit në Gaza.
Ndërkohë, Izraeli përballet edhe me një padi për gjenocid në Gjykatën Ndërkombëtare të Drejtësisë për veprimet e tij në Rripin e Gazës.
