Numri i personave të helmuar dje, në një lokal me ushqim të shpejtë në Malishevë ka arritur në 63, raporton teve1.info
Kështu bënë të ditur Policia e Kosovës në raportin ditor, ku thuhet se deri në mesnatë ndihmë mjekësore në QKMF kanë kërkuar rreth 63 persona, derisa tre prej tyre janë dërguar në QKUK për tretman mjekësor.
Lidhur me këtë rast, policia thotë se është arrestuar pronari i lokalit, i cili me vendim të prokurorit është dërguar në mbajtje.
“Nga QKMF –Malishevë është raportuar se nga ora 16:48 e datës së lartcekur e deri në mesnatë ndihmë mjekësor kanë kërkuar rreth 63 persona nën dyshimin se janë infektuar nga ushqimi nga një lokal ushqimor në Malishevë, ndërsa tre prej tyre janë dërguar në QKUK-ë për tretman të mëtutjeshëm mjekësor. Lidhur me rastin është arrestuar pronari i lokalit i dyshuari mashkull kosovar dhe me vendim të prokurorit kujdestar, i dyshuari është dërguar në mbajtje”, thuhet në njoftimin e Policisë së Kosovës.
Ndërkaq, mbrëmë në Kliniken Infektive janë dërguar 11 pacientë, ku për gjendjen e tyre ka folur drejtoresha Lindita Ajazi, duke bërë të ditur se janë në gjendje stabile.
“Për momentin në gjendjen Klinike Infektive i kemi të spitalizuar 11 pacientë, këta janë personat të cilët kanë konsumuar ushqimin e njëjtë dhe kanë pasur nevojë për trajtimin spitalor. Për momentin gjendja e tyre është stabile, janë ndërmarrë të gjitha masat e nevojshme dhe presim t’i përcjellim në ditët në vazhdim gjendjen e tyre”, tha doktoresha Lindita Ajazi.
Ajazi, tha se për 11 pacientët pas 24-orëve do të bëhet vlerësimi se a do të vazhdojnë me trajtim mjekësor apo do të jenë në gjendje që të lirohen për në shtëpi./teve1.info/
11 nga 40 personat e helmuar në Malishevë po trajtohen në Kliniken Infektive, gjendja e tyre stabile
