Kutitë e votimit të ardhura nga jashtë Kosovës janë hapur këtë të premte në Qendrën e Numërimit dhe Rezultateve në Prishtinë.
Me këtë ka nisur edhe procesi i numërimit të fletëvotimeve të diasporës të cilat po kalojnë në fazën e verifikimit dhe përpunimit, para se të përfshihen në rezultatet përfundimtare.
Zëdhënësi i Komisionit Qendror të Zgjedhjeve, Valmir Elezi, theksoi që tërheqjet e fundit të zarfeve me fletëvotime do të bëhen më 2 dhe 5 janar.
“Nga 19,187 shtetasit e regjistruar, kanë votuar 16,165 prej tyre apo 84.24% dhe këto fletëvotime do t’i nënshtrohen numërimit. Pas përfundimit të numërimit të fletëvotimeve nga votimi fizik në përfaqësitë diplomatik, do të vazhdojmë me numërimin e fletëvotimeve nga votimi përmes postës, që deri më tani janë tërhequr nga dy kutitë postare jashtë vendit, ajo në Berlin (Gjermani) dhe në Bernë (Zvicër). Nga votimi me postë, siç e kemi treguar më herët, numri i shtetasve të regjistruar ka qenë rreth 58 mijë”, deklaroi Elezi.
Elezi shtoi se nga mbi 28,500 pako me fletëvotime të supozuara të tërhequra deri tani, janë aprovuar vetëm 27,600.
“Arsyeja më e shprehur te zarfet e refuzuara është sepse në pakon me fletëvotim mungon dëftesa e regjistrimit të votuesit. Pra, në procesin e numërimit do të përfshihen 27,600 zarfe të supozuara me fletëvotime prej votimit përmes postës”.
Ai ka bërë të ditur se Komisioni Qendror i Zgjedhjeve po vazhdon aktivitetet për shpalljen sa më të shpejtë të rezultateve përfundimtare të zgjedhjeve të parakohshme për Kuvendin e Kosovës, të mbajtura më 28 dhjetor.
Elezi ka thënë se presin që numërimet në Qendrat Komunale të Numërimit të përmbyllen në fundjavë.
Kronikë e realizuar nga gazetarja Jona Kelmendi.
