Komisioni Qendror i Zgjedhjeve (KQZ) ka bërë të ditur se numërimi i votave në Qendrat Komunale të Numërimit, do të filloj më 8 qershor, në disa komuna do të filloj në ora 16:00 pasdite, ndërsa në komunat më të vogla në ora 9:00 të mëngjesit.
Kryetari i KQZ-së Kreshnik Radoniqi bëri të ditur se rezultati përfundimtar do të jepet pasi të numërohet votat e diasporës, me postë, me votim në përfaqësi diplomatike, votat me kusht dhe të personave me nevoja të veçanta.
“Rezultati përfundimtar do të jepet pasi që të numërohet votat e diasporës, me postë dhe me votimin në përfaqësi diplomatike. Po ashtu edhe votat me kusht, të personave me nevoja të veçanta dhe pas numërimit të të gjitha votave do të jepet rezultati përfundimtarë. Nga nesër do të filloj numërimi në Qendrat Komunale të Numërimit, nuk do të filloj në të gjithat në mëngjesin e së nesërmes, në disa komuna do të filloj numërimi në ora 16:00 pasdite, për shkak se materiali do të grumbullohet gjatë tërë natës sonte dhe me qëllim që t’i japim mundësi ekipeve të numërimit që të pushojnë dhe KKZ që të ketë mundësi të involvohet në proces të numërimit. Në komunat më të vogla, numërimi do të filloj nga ora 9:00 e mëngjesit”, tha Radoniqi.
Radoniqi ka bërë të ditur se pas pranimit të materialit do të verifikohen të gjitha kutitë e votimit.
Ai tha se pas manipulimit me vota nëpër QKN-ja, KQZ ka ndërmarrë masa, që tavolinat e votimit të kenë nga dy monitorë dhe do të ketë masa të rrepta të kontrollit.
“Ne kemi ndërmarrë masat, ne pasi që të pranojmë materialin do ta bëjmë verifikimin e të gjitha kutive të votimit. Kemi ndërmarrë masa të tjera që tavolinat e votimit të kenë dy monitorë që të kenë mundësi të gjithë numëruesit se si bëhet numërimi. Nuk besoj që do të ketë ndonjë tentim të manipulimit siç ka ndodhur në zgjedhjet e kaluara, por edhe ne kemi ndërmarrë masa të kontrollit më të rreptë”, tha ai.
KQZ deri më tani ka numëruar 2 mijë e 429 kuti të votimit prej 2 mijë e 498, apo 97.24 përqind.
Nga rezultatet preliminare, Lëvizja Vetëvendosje ka 292 mijë e 426 vota apo 43.05 përqind, PDK 21.21 përqind, LDK 17.69 përqind, Aleanca 7.10 përqind.
