Ndërkaq rezultatet përfundimtare pritet të dalin në dhjetor të vitit 2023.
E nisur nga rezultatet e viteve të kaluara, njohësit e kësaj fushe nuk presin rezultate më të mira as kësaj here.
Njohësi i arsimit, Rinor Qehaja, thotë se rezultatet e këtij testi nuk do të jenë më të mira se herëve të kaluara.
“Neve nuk mendojmë se do të ketë përmirësim në rankim ose në rezultat për arsye shumë të ditura, është thelbi i memorizimit, si mjet i vetëm i mësimnxënjes. E derisa të tejkalojmë këtë ngecje kam përshtypjen që ky rezultat do të vazhdojë të mbetet i njëjti prezent”, thotë Qehaja.
Të njëjtin mendim e ka edhe Ditjon Fetahu, kryetar i Këshillit Rinor Kosovar.
Madje ky mendon që kësaj here rezultatet do të jenë më të dobëta.
“Për dallim prej viteve tjera, duke e pa dhe analizu sistemin dhe politikat arsimore ne mendojmë që këtë vit do të rankohemi akoma edhe më poshtë. Nuk e di a mundemi me dal më poshtë se fundi mirëpo aty tek fundi do të jemi”, thotë ai.
Fetahu vlerëson se nisur nga periudha pandemike e humbja e mësimit, Kosova nuk duhej t’i nënshtrohej Testit PISA.
Testi PISA e ka nxjerrë Kosovën gati në fund të listës botërore në vitin 2015 dhe 2018. Rezultatet e testit të parë janë publikuar më 2016, kur Kosova është radhitur e 68-ta, në mesin e 72 vendeve.
Rezultatet e testit të dytë janë publikuar më 2019, me Kosovën në vendin e 77-të, në mesin e 79 vendeve pjesëmarrëse.
Kronika e realizuar nga Valëza Sylejmani
