Sot, Qeveria e Kosovës ka miratuar rritjen e pensioneve për të gjitha kategoritë e dala nga lufta e fundit në Kosovë për 20%
Por, këtë rritje invalidi i UÇK-së, Arton Hoti, e konsideron mashtrim.
Sipas Hotit, Qeveria e Kosovës e miratoi këtë vendim për t’i mashtruar veteranët në mënyrë që t’i votojnë për zgjedhjet e 9 shkurtit.
“Nuk është vendim, është mashtrim – për shkak të fushatës, në mënyrë që me u mundu me i mashtrua veteranët që me i votua edhe një herë. Me këtë vendim po kërkon vota. Në fillim të mandatit të tyre, këta nuk kanë pasur nevojë me u bë bashkë me Listat Serbe që me votua në Parlamentin e Kosovës mos-përfshirjen e veteranëve dhe organizatat e dala nga lufta në pagën minimale”, tha ai në emisionin “Ditari” në Tëvë1.
Hoti thotë se Qeveria e Kosovës i ka fyer e i ka ofenduar veteranët dhe organizatat e dala nga lufta.
“Këta janë bë bashkë me Listën Serbe edhe e kanë votu që për mos me qenë në pagën minimale veteranët dhe organizatat e dala nga lufta. Këta na kanë fyer na kanë diskriminuar në mënyrën më të keqe… Veteranët i marrin 350 euro rrogë minimale me ligjin e Kosovës, këta na kanë hequr nga paga minimale dhe tash e kanë bërë ‘fetin’ me këtë rritje 20%, hajgare hesapi me i marrë 204 euro”, deklaroi ai.
Ministri i Financave i Kosovës, Hekuran Murati, tha se rritja për të gjitha kategoritë e veteranëve, invalidëve dhe viktimave të dhunës seksuale do të jetë 20 për qind mbi shumën e tanishme pensionale.
Për disa kategori ka rritje edhe përtej shkallës prej 20 për qind, tha ministri. Kategoritë që përfitojnë rritje mbi 20 për qind, janë familjet e dëshmorëve të UÇK-së që kanë dy dëshmorë ose më tepër, familjet e të zhdukurve të UÇK-së që kanë mbi dy të zhdukur dhe familjet e viktimave civile, tha ai.
Ndërkaq, rritja do të vlejë nga ky muaj./teve1.info/
