Ministri i Mbrojtjes së Shqipërisë ka deklaruar se është ende në fazat e hershme të vlerësimit lidhur me mundësinë e dërgimit të forcave ushtarake shqiptare dhe të Kosovës në Gaza, si pjesë e një Forcë Ndërkombëtare Stabilizuese.
Në një konferencë të përbashkët për media me homologun kosovar, Ejup Maqedonci, ai ka thënë se procesi është ende në shqyrtim dhe se po analizohen kushtet në terren.
“Jemi në faza shumë të hershme, akoma duke shqyrtuar dhe vëzhguar territorin ku mund të vendosen trupat tonë. Besojmë që në të ardhmen do të mund të japim një përgjigje të saktë se sa trupa do të shkojnë, ku do të shkojnë, cilat do të jenë rregullat e angazhimit në territor”, ka deklaruar ai.
Sipas tij, Shqipëria ka përvojë të gjatë në misione ndërkombëtare, përfshirë Afganistanin, Irakun, Bosnjën, si dhe angazhime aktuale në vende të ndryshme të botës.
Ai ka shtuar se bashkëpunimi me Forcën e Sigurisë së Kosovës do të ndihmojë në vlerësimin e situatës dhe në marrjen e vendimeve përfundimtare.
“Shqipëria ka një eksperiencë shumë vjeçare me angazhimin e misioneve ndërkombëtare duke filluar nga Afganistani, Iraku, Bosnja e shumë vende të tjera, kemi trupat tonë në Letoni dhe shumë vende të tejra të botës. Besoj që me angazhimin e përbashkët me FSK-në do të mund të bëjmë një vlerësim të situatës në terren dhe të marrim vendimarrjen”, ka përfunduar ai./teve1.info/
