Juristi, Anton Nrecaj ka vlerësuar se nëse deputetët e Kuvendit të Kosovës nuk votojnë asnjë kandidat të Listës Serbe për pozitën e nënkryetarit të pestë të Kuvendit, atëherë situata mund të përsëritet dhe sërish të zgjidhet Nenad Rashiq.
Në emisionin “Ditari” në Tëvë1, Nrecaj ka thënë se edhe në rast se deputetët refuzojnë kandidatët e Listës Serbe, Kuvendi mund të konstituohet përmes votimit të një kandidati tjetër, siç është Rashiq, pavarësisht se zgjedhja e tij ishte shpallur më herët antikushtetuese.
“Nëse deputetët nuk e votojnë asnjë prej kandidatëve të Listës Serbe për nënkryetar serb, do ta kemi të njëjtën situatë. Kuvendi do të konstituohet sepse do të votohet një kandidat tjetër. Në këtë rast mund të jetë Nenad Rashiq, edhe pse zgjedhja e tij u shpall antikushtetuese”, ka deklaruar Nrecaj.
Sipas tij, një situatë e tillë do të lejonte që Kuvendi të vazhdojë punën deri në një vendim të ri të Gjykatës Kushtetuese, e cila do ta sqaronte përfundimisht këtë çështje.
I pyetur nëse deputetët janë të obliguar domosdoshmërisht të votojnë një kandidat nga Lista Serbe, Nrecaj ka theksuar se vullneti i lirë i deputetëve nuk mund të cenohet.
“Kushtetuesja në aktgjykimet e mëhershme e ka sqaruar se vullneti i lirë i deputetit për të votuar është e drejtë individuale dhe nuk mund të ndikohet. Megjithatë, deputeti ka detyrim ligjor dhe kushtetues të qëndrojë në sallë dhe të votojë”, është shprehur ai.
