Avokati, Anton Nrecaj e ka cilësuar si kërcënim për stabilitetin e Kosovës deklaratën e presidentit të Serbisë, Aleksandër Vuçiq, i cili ka thënë se brenda dhjetë ditëve të ardhshme do të hapen 400 vende të reja pune në sistemin shëndetësor të Kosovës.
Në emisionin “Ditari” në Tëvë1, Nrecaj ka theksuar se qytetarët serbë në Mitrovicën e Veriut, të cilët, sipas tij, kontrollohen nga Lista Serbe, mund të joshen financiarisht nga ky premtim.
“Deklarata është kërcënim për stabilitetin e vendit. Qytetarët serbë në veri, të cilët kontrollohen përmes Listës Serbe, duke marrë parasysh edhe gjendjen e rëndë socio-ekonomike në vend, mund të joshen nga mbështetja financiare. Por që Serbia të hap vende pune në Kosovë, kjo është absurde,” është shprehur Nrecaj.
Ai gjithashtu ka kërkuar nga institucionet e sigurisë që të jenë vigjilente gjatë procesit zgjedhor, pasi ekziston rreziku që zyrtarë të Serbisë të ndërhyjnë dhe të ndikojnë në votimin e qytetarëve serbë në veri.
“Rreziku më i madh është që në ditën e zgjedhjeve dhe gjatë gjithë fushatës, institucionet tona, qoftë Agjencia e Inteligjencës së Kosovës apo Policia e Kosovës të jenë sy e veshë hapur dhe të monitorojnë çdo lëvizje. Sepse, si në të kaluarën, zyrtarë të Ministrisë së Punëve të Brendshme të Serbisë, të maskuar si qytetarë të Kosovës, kanë kërcënuar dhe shantazhuar qytetarët serbë për të votuar Listën Serbe, e cila realisht është dorë e zgjatur e Serbisë brenda institucioneve të Kosovës,” ka shtuar ai./teve1.info/
