Norvegjia , Suedia dhe Danimarka kanë njoftuar planet për të financuar së bashku një paketë mbështetjeje për Ukrainën në kuadër të mekanizmit të ri SHBA-NATO , Lista e Kërkesave me Prioritet për Ukrainën, e dakordësuar me presidentin e SHBA-së Donald Trump muajin e kaluar.
Paketa, e cila vlerësohet të ketë një vlerë totale prej rreth 430 milionë eurosh, do të përfshijë mbështetje për “mbrojtjen ajrore të Ukrainës, municionet dhe pajisjet e tjera thelbësore”, thuhet në njoftimin për shtyp të qeverisë norvegjeze .
Suedia do të japë kontributin më të madh prej mbi 230 milionë eurosh, e ndjekur nga Norvegjia me rreth 120 milionë euro dhe Danimarka me rreth 80 milionë euro , sipas totaleve të treguara, ka raportuar The Guardian.
Ministri norvegjez i mbrojtjes, Tore O. Sandvik, tha se paketa e re kishte për qëllim të siguronte që Ukraina “të merrte shpejt pajisjet që i nevojiten” për t’u mbrojtur nga Rusia.
Njëkohësisht, ministrat suedezë prezantuan skicën e marrëveshjes në një konferencë për shtyp në Stokholm.
Në deklaratën e saj hapëse, zëvendëskryeministrja dhe ministrja e energjisë dhe industrisë, Ebba Busch, këmbënguli se “kauza e Ukrainës është kauza jonë”, ndërsa theksoi nevojën për të vazhduar mbështetjen e Ukrainës mes sulmeve të vazhdueshme ruse.
Ministri i Mbrojtjes, Pål Jonson, shtoi se sulmet e vazhdueshme treguan se kishte pak dëshirë nga Rusia për t’i dhënë fund konfliktit.
Kjo është një paketë e dytë e këtij lloji pasi Holanda njoftoi planet e saj për të shpenzuar rreth 500 milionë euro për armë amerikane për Ukrainën sipas skemës së re.
