Norvegjia planifikon të prezantojë një moshë minimale prej 16-vjeç për përdorimin e mediave sociale, duke shtrënguar rregullat ekzistuese dhe duke i ngarkuar përgjegjësinë kompanive të teknologjisë për të verifikuar moshën e përdoruesve, tha sot kryeministri, Jonas Gahr Store.
Propozimi pritet të paraqitet në parlament më vonë këtë vit.
Propozimi parasheh ndalimin e aksesit në platformat e mediave sociale deri më 1 janar të vitit në të cilin një përdorues mbush 16-vjeç, raportoi transmetuesi norvegjez NRK.
Nëse miratohet nga ligjvënësit, masa mund të hyjë në fuqi që vitin e ardhshëm.
“Ne kemi dëgjuar kontributin e konsultimeve, përfshirë nga fëmijët dhe të rinjtë që na drejtuan në atë drejtim”, tha Ministrja e Fëmijëve dhe Familjeve, Lene Vagslid.
Qeveria kishte propozuar më parë një kufi 15-vjeçar bazuar në datën e lindjes, por zgjodhi një sistem më të rreptë dhe më uniform.
Autoritetet argumentojnë se lejimi i të gjithë përdoruesve të lindur në të njëjtin vit për të fituar akses njëkohësisht do të parandalonte ndarjet sociale brenda klasave shkollore.
