Letra jo-zyrtare, si propozim kryesor ka miratimin e një ligji të ri me emrin Ligji për Bashkëpunim dhe Koordinim Ndërkomunal.
Ky dokument po ashtu thotë se edhe Asociacioni i Komunave të Kosovës është në kundërshtim me ligjet në Kosovë.
Ish anëtari i Gjykatës Kushtetuese të Kosovës, Kadri Kryeziu, këtë propozim e cilëson serioz dhe kreativ.
“E lexova, e përpunova, kështu qe unë pash shumë gjëra serioze edhe një ligj kreativ i cili nuk bie ndesh me të drejtën ose lirinë e asociimit … formimi i asociacionit të komunave me shumicë serbe është entitet juridik andaj një zgjidhje e mirë është ligji për komunat dhe bashkëpunimin e tyre të komunave”, tha Kryeziu.
Ndërsa njohësi i çështjeve politike Arton Demhasaj thotë se ligji që këshillon ky dokument për miratim, është vështirë të miratohet në Kuvendin e Kosovës.
“Për një ligj të tillë, gjithmonë nuk mund ky ligj të votohet vetëm me një shumicë të thjeshtë në Kuvendin e Kosovës, por për me u votu një ligj i tillë i cili parasheh të drejtën e organizimit në asociacione që përfshinë edhe komunitetin serb në këtë rast, atëherë automatikisht kërkohet një shumicë e dyfishtë, pra që i bie 2/3 e Kuvendit, por njëkohësisht edhe 2/3 e minoriteteve, pra është e vështirë një ligj i tillë përmbajtjesor që flet edhe për asociacionin e komunave me shumicë serbe të mund të votohet pa votu 2/3 e minoriteteve në Kosovë, pra goxha e vështirë është edhe proceduralisht ky ligj me kalu në Kuvend”, deklaroi Demhasaj.
Kërkesa e Bashkësisë ndërkombëtare është që asociacioni duhet të themelohet dhe nuk duhet të mundësoi krijimin e një shteti brenda shtetit.
Kronika e gazetarit Valmir Gallopeni.
