Nënkryetari i Listës Serbe i shpallur non-grata nga Shtetet e Bashkuara të Amerikës, Milan Radoiçiq, së bashku me liderët tjerë të Listës Serbe, kanë marrë pjesë në seancën e Kuvendit të Serbisë, ku u diskutua për Kosovën dhe planin franko-gjerman.
Ata janë kapur nga kamerat duke duartrokitur fjalimin e presidentit serb, Aleksandër Vuçiq.
Ndryshë më herët u raportua se opozita e djathë serbe, e udhëhequr nga Boshko Obradoviq, për pak sa nuk u përfshi në një konflikt fizik me Vuçiqin dhe eksponentë të tij.
Shkak ishte debati që u bë në këtë seancë për Kosovën dhe planin franko-gjerman.
Përfaqësuesit e opozitës kanë shpalosur pankartën “Jo kapitullimit” dhe kanë shkëmbyer akuza mes vete duke pyetur se “Kush e tradhtoi Kosovën”. Po ashtu disa deputetë të opozitës vendosën pankarta “Vuçiq , e tradhtove Kosovën”, “Vuçiq, e tradhtove Serbinë”, dhe një pankartë me imazhin e Oliver Ivanoviqit. Opozita e drejtuar nga deputeti Boshko Obradoviq gjithastu ka shpalosur pankarta me mbishkrimet “Kosova është zemra e Serbisë” dhe “Nuk do të heqim dorë nga Kosova”,
Presidenti i Serbisë, Aleksandar Vuçiq, në debatin me opozitën në Kuvend për negociatat me Kosovën, tha se do t’i ftojë sërish partitë të konsultohen për planin franko-gjerman, transmeton teve1.info.
Sa i përket themelimit të Asociacionit të komunave me shumicë serbe, Vuçiq ka thënë se duhet të jetë ajo që është nënshkruar në Bruksel.
“Asociacioni nuk mund të jetë model i ndonjë organizate joqeveritare, duhet të jetë ajo që është nënshkruar në Bruksel”, shtoi ai.
Vuçiq nga foltorja e Kuvendit tha se “nuk ka kapitullim dhe dorëzim të Kosovës”.
