Ky mesazh me fjalë kërcënuese i shkoi presidentes së vendit, Vjosa Osmani Sadriu mbrëmjen e 15 majit.
Mesazhin e bëri publik zyra e presidencës më 19 maj.
Por ky nuk është rasti i vetëm që presidentja merr kërcënime.
Këshilltari i Osmanit, Bekim Kupina ka thënë që edhe më herët kanë pranuar mesazhe të tilla.
“Kërcënimi i fundit me jetë ndaj presidentes së Kosovës, Vjosa Osmani, është vetëm një në vargun e gjatë të kërcënimeve të vazhdueshme që ajo ka marrë ndër vite. Ky është rasti i vetëm në historikun institucional, siç na është thënë nga vetë institucionet e sigurisë, ku asnjë nga kërcënuesit nuk është përballur me drejtësinë”, ka thënë Kupina.
Menjëherë për këtë rast janë vënë në lëvizje organet e sigurisë.
Në një përgjigje për Tëvë1, Policia e Kosovës thotë se është njoftuar prokurori i shtetit.
“ Policia e Kosovës ditë më parë ka pranuar informacionin që ju i referoheni, sipas procedurave është njoftuar Prokurori i shtetit dhe është iniciuar rast penal”, thuhet nga Policia e Kosovës.
E njohësi i sigurisë, Nuredin Ibishi thotë se këto mesazhe duhet të merren seriozisht nga institucionet e vendit.
“Duhet të merret seriozisht, institucionet e sigurisë në këtë rast Policia dhe Prokuroria por normal edhe gjyqësia duhet të jep verdiktin e vet në kuptim të sidomos te rastet çfarë u përfol që në vazhdimësi kjo po ndodh përtej asaj që po është edhe në medie në debate të ndryshme kërcënimet e tilla…. Ai vlerëson shkallën e rrezikshmërisë edhe përshtatshëm i vihen masat shtesë të sigurisë qoftë në vend apo edhe në lëvizje”, vlerëson Ibishi.
E eksperti i kibernetikës, Mentor Hoxhaj thekson që këto kërcënime mund të lidhen edhe politikisht.
“ Nga ajo që e kemi parë ndonëse nuk kemi ndonjë informacion të brendshëm, nuk kemi ndonjë raport të forenzikës nga njësia për Krime Kibernetike mendoj se është një sulëm i izoluar dhe nga një person të themi kushtimisht i frustruar politikisht” , thotë Hoxhaj.
