Kosovën dhe Serbinë i presin kompromise të vështira për të ardhur deri te normalizimi i marrëdhënieve mes tyre.
Ky është mesazhi që së fundmi është përcjell nga Sekretari amerikan i Shtetit, Antony Blinken, përmes letrës së urimit që i ka dërguar presidentit serb, Aleksandar Vuçiq.
Politologu, Dritëro Arifi thotë se Blinken veçse e ka bërë të qartë se Serbia nuk mund t’i ikë njohjes së Kosovës, përderisa ka treguar edhe kompromiset me të cilat mund të përballet Kosova.
Edhe njohësi i çështjeve politike, Visar Xani vlerëson se formimi i Asociacionit është kompromisi kryesor që do të përballet vendi.
Sipas tij, në të kaluarën është Kosova ajo që ka pasur më së shumti barriera në procesin e dialogut.
Muajve të fundit është shtuar presioni ndërkombëtar për formimin e Asociacionit.
Edhe kryeministri Albin Kurti ka deklaruar ditë më parë në Kuvendin e Kosovës se e pranon krijimin e Asociacionit, por me plotësimin e gjashtë kushteve.
Kronika e realizuar nga gazetari Lindrit Zejnullahu
