Punojnë me orar 12 orësh dhe janë të angazhuar tash e disa vite në veriun e vendit.
Sipas burimeve të tëvë1, këtyre pjesëtarëve të Njësive Elite të Policisë së Kosovës, nga 4 tetori do t’u ofrohet vetëm një shujtë ushqimi gjatë këtij orari të punës.
Në një përgjigje për tëvë1, Sindikata e Policisë së Kosovës ka thënë se është kundër çdo ndalimi të benefiteve pasi që kjo ndikon direkt në punën e zyrtarëve policorë e motivimin e tyre.
“Në këtë kontekst, Sindikata e Policisë së Kosovës i bën thirrje të gjithë akterëve përkatës që të ruhet praktika e deritanishme e dhënies së shujtës, duke siguruar që punonjësit e policisë të vazhdojnë të kenë kushtet e nevojshme për të kryer detyrën e tyre në mënyrë efikase dhe të sigurt. Sindikata e Policisë së Kosovës mbetet e përkushtuar në përpjekjet për të siguruar që dhënia e shujtës të përfshijë të gjithë punonjësit e Policisë së Kosovës, duke eliminuar çdo diferencim ndërmjet njësive dhe duke garantuar që benefitet të jenë të barabarta për të gjithë”, thuhet nga Sindikata.
Kundër këtij vendimi është edhe nënkoloneli në pension i Policisë, Refki Morina.
Sipas tij, duhet rishikuar vendimi për arsye se angazhimi në atë pjesë të vendit, është me ndjeshmëri më të madhe.
“Janë të nevojshme, 24 orë dmth vazhdimisht ata janë në detyrë, kanë udhëtime të gjata, të cilët udhëtojnë prej vendeve të ndryshme, prandaj një gjë e tillë besoj që do të rishikohet nga kompetentët dhe do të kthehet ajo që duhet të jetë. Dmth duhet ta kenë shujtën e merituar qysh e kanë pasë deri më tani”, tha Morina.
Tëvë1 ka pyetur edhe menaxhmentin e Policisë së Kosovës për të konfirmuar se a është marrë një vendim i tillë dhe për çfarë arsye, por që nuk ka pasur përgjigje.
