Njësitë Antikontrabandë të Doganës së Kosovës kanë ndaluar një automjet të dyshuar për transport të mallrave të kontrabanduara në pikën kufitare të Hanit të Elezit.
Sipas njoftimit të Doganës në Facebook, rasti ka ndodhur mbrëmë rreth orës 21:30, kur “rreth 50 metra poshtë pikës doganore është vërejtur një automjet i tipit Audi me targa të huaja pranë të cilit qëndronin disa persona”. Me afrimin e njësive, personat janë larguar, ndërsa shoferi i automjetit ka tentuar të ikë drejt zonës malore.
“Gjatë kontrollit janë gjetur thasë plastikë të mbushur me pako kafeje për aparat. Automjeti është shoqëruar për kontroll të detajuar në kalimin e vjetër kufitar, ku pas verifikimit është konstatuar se malli i gjetur, për të cilin nuk kishte dokumentacion përcjellës, përbëhej nga: Caffe për aparat (kapsula) – 24 paketa x 150 copë (7.2 gr secila)”, thuhet në njoftim.
I gjithë malli është konfiskuar, ndërsa ndaj palës është ndërmarrë procedura ligjore sipas dispozitave në fuqi.
“Dogana e Kosovës mbetet e përkushtuar në luftën kundër kontrabandës dhe mbrojtjen e ekonomisë së ligjshme në vend”, përfundon njoftimi.
