Një partner në koalicionin qeverisës gjerman i kërkoi të mërkurën qeverisë të hapë rrugën për sanksione tregtare evropiane ndaj Izraelit për shkak të luftës së tij brutale në Gaza.
“Gjermania duhet të heqë bllokadën e saj (mbi sanksionet), sepse pothuajse çdo shtet tjetër evropian po e bën këtë”, tha zëdhënësi i politikës së jashtme të Partisë Social Demokratike (SPD), Adis Ahmetoviç, për radion publike Deutschlandfunk, duke iu referuar propozimeve konkrete të paraqitura nga Presidentja e Komisionit të BE-së, Ursula.
Në mbështetje të sanksioneve, ai përmendi gjithashtu përshkallëzimin e luftës nga Izraeli me pushtimin e qytetit të Gazës, duke e quajtur atë të papranueshme dhe një shkelje të mëtejshme të së drejtës ndërkombëtare.
Ai theksoi se askush nuk po thotë që Gjermania duhet “të jetë më e zëshmja në kërkesat për sanksione ndaj qeverisë izraelite. Por ne duhet ta përshtasim kursin tonë me standardet evropiane dhe ta hapim rrugën”.
Në fund, vetëm Hungaria, Republika Çeke, Italia dhe Gjermania do të jenë kundër, tha ai, citon Anadolu.
Qeveria e qendrës së djathtë është thellësisht e ndarë në lidhje me vendosjen e sanksioneve tregtare të BE-së, pasi partia Bashkimi Kristian Demokrat (CDU) kundërshton me forcë një veprim të tillë, ndërsa partneri i saj i vogël i koalicionit, SPD, e mbështet atë.
Shumica e gjermanëve mbështesin sanksionet kundër Izraelit për shkak të luftës në Gaza, sipas sondazheve të publikuara në muajt e fundit.
Bazuar në informacionin nga Agjencia Gjermane e Shtypit (dpa), planet e Komisionit të BE-së tani synojnë pezullimin e disa marrëveshjeve tregtare midis BE-së dhe Izraelit.
Në veçanti, këto rregullojnë se cilat mallra mund të tregtohen pa taksa ose me tarifa preferenciale. Një propozim konkret do t’u paraqitet shteteve anëtare të BE-së më vonë të mërkurën.
