Në tetor të vitit 2024, u hap thirrja për aplikim për bujqit dhe fermrët e Luginës së Preshevës.
E në dhjetor për këto aplikime Qeveria e Kosovës ndau 1 milonë euro për bujqit e Preshevës, Bujanocit dhe Medvegjës.
Për gati një vit, të përzgjedhurit që aplikuan përmes Këshillit Kombëtar Shqiptar për fitim të këtyre mjeteve ende nuk i morën.
Kjo për shkak që Serbia e bllokoi këtë proces.
Këtë si shkelje të të drejtave të njeriut e sheh kryetari i Këshillit Kombëtar Shqiptar, Enkel Rexhepi.
“Unë edhe njëherë i bëjë thirrje ministrit që atë vendim të shfuqizoj. Ato të holla janë të atyre bujqve, ato të holla nuk do të alokohen për asgjë tjetër, do të jenë vetëm për përfituesit. Shqiptarët e Luginës së Preshevës nuk përfitojnë në Ministrinë e Bujqësisë së Serbisë, sepse ata nuk japin fond për shqiptarët dhe duke mos iu japur fond ne e kemi parë të rrugës të krijojmë një fond për t’i ndihmuar shqiptarët sepse këto anë janë zona ku punohet toka”.
Nga Qeveria e Kosovës thonë bllokada nga Serbia është vazhdim i qasjes destruktive për shqiptarët atje.
Klisman Kadiu, këshilltar i zëvendës-kryeministrit Besnik Bislimi thotë se Serbia nuk është e gatshme për normalizim të marrëdhënieve.
“Kjo bllokadë është dëshmi e radhës e qasjes së vazhdueshme dhe destruktive nga ana e Serbisë dhe diskriminimit të shqiptarëve të Luginës. Serbia është faktor destabiliteti në rajon. Sulmet e vazhdueshme të Serbisë ndaj Kosovës, bashkë me bllokada dhe që prej një viti ndalimi i financimit të qeverisë sonë ndaj bujqve të Luginës, tregojnë se fqinji ynë verior fatkeqësisht nuk është i gatshëm për normalizim të marrëdhënieve. Edhe në diskutimet e fundit në Bruksel në muajin shtator, atje ku kemi ngritur këtë çështje e cila është tejet me rëndësi dhe njëkohësisht shqetësuese për ne, Serbia ka refuzuar të diskutojë mbi të dhe braktisur takimin. Qeveria ju ka qëndruar e do të vazhdojë t’i qëndrojë pranë Luginës së Preshevës dhe të gjithë shqiptarëve atje. Çdo vit veçse e kemi rritur mbështetjen e përkrahjen financiare për Luginën. Kontaktet me përfaqësuesit shqiptarë atje janë të rregullta, e do të vazhdojmë ta ngremë zërin për padrejtësitë që iu bëhen shqiptarëve”.
Ministria për të Drejtat e Njeriut dhe Minoriteteve në Beograd, ka qenë ajo që ka kërkuar nga KKSH-ja që të anulohet konkursi për subvencionimin e kulturave bujqësore nga Fondi i Republikës së Kosovës.
