Fiks një vit më parë, u sekuestruan 400 kilogramë kokainë, vlera e së cilës arrinte 20 milionë euro. Ky lloj droge u gjet në Lipjan në kutia të mbushura me mish pule, paketim i cili prejardhjen e kishte nga Brazili.
Katër të dyshuarit vazhdojnë të qëndrojnë në paraburgim, megjithëse ende nuk iu është ngritur aktakuzë.
Më 1 maj, Izet Shaqiri, Kadri Brahimi, Fehmi Bytyqi dhe Faton Vrajollit iu vazhdua edhe për dy muaj të tjerë masa e paraburgimit, nën dyshimin për blerje, posedim dhe shpërndarje të substancave narkotike, dhe pjesëmarrje në krim të organizuar.
Për këtë, tëvë1 ka siguruar materialet se ku e ka bazuar Prokuroria Speciale vazhdimin e paraburgimit.
“Gjykatës do t’i paraqiten në mënyrë konfidenciale prova dhe do të bindet se rreziku për dhunë, duke mos e përjashtuar edhe rrezikun për jetë, është evident dhe i mundshëm nga të pandehurit të cilët vazhdimisht bëjnë plane që përmes metodave të ndryshme të arrijnë këtë qëllim. Marrë për bazë faktin se të njëjtit janë mirë strukturuar si grup dhe kanë fuqi ekonomike/financiare, rreziku për dhunë me qëllim të arritjes së qëllimit të tyre është i pashmangshëm dhe evident në çdo moment”.
Por sipas këtyre materialeve gjykata nuk i ka pranuar këto prova konfidenciale.
Mirëpo, kjo nuk ndaloi Departamentin Special të Gjykatës Themelore në Prishtinë, që ta aprovonte kërkesën për vazhdim të masës së paraburgimit.
“Sa i përket të dhënave të referuara mbi rrezikun për dhunë ndaj personave të caktuar, kërkesës nuk i është bashkangjitur asnjë provë konkrete në këtë drejtim, që do të bënte të besueshme ekzistimin e një rreziku të tillë konkret, i cili pretendohet në kërkesën për vazhdimin e paraburgimit për 12 muaj, mirëpo gjykata gjen se ekziston shkak i bazuar për të besuar në ekzistimin e rrezikut të përgjithshëm, që gjykuar në relacion me kompleksititetin e rastit, numrit të provave dhe spektrin e shtrirjes së hetimeve, bazuar në shtrirjen e aktivitetit kriminal, të grupit të strukturuar ka bazë ligjore për zgjatjen e paraburgimit edhe për dy muaj”.
Mbrojtësit e kanë apeluar këtë vendim të Themelores.
Televizioni ka tentuar të marrë qëndrim nga Gjykata Themelore në Prishtinë dhe Prokuroria Speciale, por nuk ka marrë përgjigje.
Ky operacion anti drogë, kishte bërë bashkë Policinë e Kosovës, Policinë Shqiptare, atë italiane dhe DEA-n amerikane.
Raporti i gazetares Florijeta Dernjani.
