Oda Ekonomike e Kosovës (OEK) ka njoftuar se edhe një biznes tjetër ka fituar rastin gjyqësor në Gjykatën Komerciale kundër Zyrës së Rregullatorit për Energji (ZRrE), lidhur me vendimin për daljen e detyrueshme të konsumatorëve në tregun e lirë të energjisë.
Ky është aktgjykimi i tretë radhazi në favor të bizneseve, duke forcuar pozicionin e tyre kundër vendimeve të ZRrE-së, të cilat OEK i cilëson si të padrejta dhe të dëmshme për sektorin privat.
“Tani ekzistojnë prova të mjaftueshme që dëshmojnë se ZRrE duhet të reflektojë. Kërkojmë pezullimin e menjëhershëm të njoftimit për tregun e lirë, përpara se të shkaktohen dëme edhe më të mëdha për biznesin,” thuhet në reagimin zyrtar të OEK.
Sipas Odës, ky vendim i tretë gjyqësor vetëm sa e konfirmon të drejtën e bizneseve, e cila ishte vërtetuar që me vendimin e parë të gjykatës. Megjithatë, OEK thekson se një numër i konsiderueshëm biznesesh vazhdojnë të preken nga njoftimi i ZRrE-së, pa pasur një trajtim të barabartë ligjor.
“Kjo po krijon një pabarazi të rrezikshme në treg dhe po ndikon drejtpërdrejt në konkurrueshmërinë e bizneseve,” thekson Oda në reagim.
Në këtë kontekst, OEK u bën thirrje të gjitha bizneseve të prekura që të ndjekin rrugën ligjore për të mbrojtur interesat e tyre. Në ndihmë të tyre, është themeluar një ekip i juristëve të specializuar që ofron asistencë ligjore në përgatitjen e dokumentacionit për kundërshtimin e vendimeve të ZRrE-së.
OEK rithekson se ende nuk është vonë për ZRrE që të ndërmarrë hapa të duhur dhe të pezullojë njoftimin për tregun e lirë, për të parandaluar përshkallëzimin e mëtejshëm të krizës dhe për të garantuar një qasje të drejtë e të barabartë për të gjithë pjesëmarrësit në tregun e energjisë.
