Me temën ‘’Terapia e munguar për financimin e shëndetësisë’’, të organizuar nga Instituti Riinvest, u shpalosën problemet që lënë Kosovën prapa nga shtetet fqinje.
“Ky raport ka për qëllim me trajtu problemin kronik të financimit të shëndetësisë, siç e dimë shëndetësia financohet shumë më pak se sa vendet e rajonit dhe ato të Bashkimit Europian. Mirëpo edhe pse fatkeqësisht investimet e planifikuara në nivel të planifikimit buxhetor janë të mangëta, ato edhe nuk realizohen në përqindjen e duhur por realizohen në përqindje të ulët”, tha Alban Hashani nga Instituti Riinvest.
Prandaj u kërkua që me një nevojë urgjente problemet në shëndetësi të marrin vëmendjen e duhur në politikat publike.
“Janë probleme shumë dimensionale por zgjidhja nuk është me ik prej tyre por me u ballafaqu me to”, u shpreh Muhamet Mustafa nga ky institut.
Për profilin shëndetësor në Kosovë dha detaje profesori Pëllumb Çollaku.
“Kosova vazhdon të ketë probleme të mëdha me shkallën e papunësisë, gjë që në të njëjtën kohë po ka implikime edhe në përzgjedhjen si do të shohim më herët edhe në sistemin e sigurimeve shëndetësore të Kosovës”, tha Çollaku
Por ku janë problemet në Shëndetësi dhe çka rekomandohet sa i përket digjitalizimit dhe sistemit të informacionit shëndetësor?
“Kosova ka një vizion për agjendë digjitale dhe zgjidhje të saj dhe poashtu investimet e vazhdueshme dhe bashkëpunimet duhet të jenë prezente sidomos duke i prioritizu edhe eksperiencat të cilat i kanë edhe përdoruesit e kësaj, duke e zgjeru infrastrukturën aktuale”, u shpreh doktor Armond Daci.
“Thelbi i problemit në shëndetësinë kosovare ka qenë sistemi. Edhe pse në letër ka qenë i mirë, brenda për brenda ka qenë mos me thënë i kalbur por ka qenë i parealizueshëm ose i paaplikueshëm edhe ka pasë modifikime brenda sistemit të cilat kanë kriju do farë lidhje të shkurtra që s’na kanë leju me u zhvillu qysh duhet”, tha Elvir Azizi, nga ShSKUK.
Ndërsa për zbatimin e ligjeve, ish ministri i Shëndetësisë, Ferid Agani thotë se nuk ka vendosmëri nga institucionet.
“Ne e kemi një reformë e cila është në zhvillim e sipër e cila 10 vite është stagnu, për shkak të mungesës së vendosshmërisë për ta shty përpara”, tha Agani.
Nga të pranishmit u kërkua që të bëhet presion tek institucionet për reformim sa më të shpejt në Shëndetësi.
