Përzgjedhësi i Shqipërisë në futboll, braziliani Sylvinho, ka publikuar të premten në mesditë listën e 24 lojtarëve për ndeshjet kualifikuese të Evropianit për këtë muaj.
Shqipëria më 17 nëntor luan në udhëtim te Moldavia, ndërsa më 20 nëntor pret Ishujt Faroe në ndeshjen e fundit të këtij cikli eliminator.
Në listën e lojtarëve të ftuar për këtë ndeshje është vetëm një risi, rikthimi i Arbnor Muçollit, që është pjesë e Goteborgut në Suedi.
Në portë, Sylvinho ka ftuar Etrit Berishën, Thomas Strakoshën dhe Elhan Kastratin.
Në mbrojtje janë Elseid Hysaj, Ivan Balliu, Berat Gjimshiti, Arlind Ajeti, Ardian Ismajli, Frederic Veseli dhe Mario Mitaj.
Mesfusha përbëhet nga Ylber Ramadani, Kristjan Asllani, Keidi Bare, Klaus Gjasula, Qazim Laçi dhe Nedim Bajrami, ndërsa në sulm, përveç Muçollit, janë edhe Ernest Muçi, Myrto Uzuni, Taulant Seferi, Jasir Asani, Arbnor Muja, Sokol Cikalleshi dhe Mirlind Daku.
Grumbullimin zyrtar, Shqipëria do ta ketë të hënën, më 13 nëntor, ndërsa lojtarët që përfundojnë më herët ndeshjet me skuadrat e tyre, do të grumbullohen të dielën.
Konferencën për media, Sylvinho do ta mbaj të shtunën në orën 11:00.
Shqipëria është shumë afër që ta përsëritë suksesin e vitit 2016 kur u kualifikua në Evropianin që u organizua në Francë.
