Avokati kosovar nga Zvicra, Sali Bislimi, ka bërë të ditur se gjatë ditës së sotme do të dorëzohet një rezolutë në Dhomat e Specializuara të Kosovës, përmes së cilës kërkohet zhvillimi i një procesi të drejtë, të paanshëm dhe të barabartë.
Sipas Bislimit, kjo nismë mbështetet edhe nga disa parlamentarë zviceranë dhe bëhet në emër të Organizatës Joqeveritare “Zëri Perëndimor i Kosovës”.
Ai theksoi se, sipas vlerësimit të tyre, deri më tani nuk janë respektuar standardet e një gjykimi të drejtë.
Bislimi u shpreh kritik edhe ndaj kërkesës së Prokurorisë për nga 45 vjet burgim për të akuzuarit, duke e cilësuar këtë si të tepruar dhe si cenim të drejtësisë. Ai shtoi se prania e tyre në Hagë është edhe në shenjë proteste, me qëllim që, sipas tij, të mbrohet historia dhe lufta e UÇK-së nga çdo përpjekje për njollosje.
“Rezoluta do të dërgohet sot në Gjykatë dhe besoj që çdo send do të jetë në rregull. Është një thirrje edhe nga parlamentarët zviceran në emër të Organizatës Joqeveritare ‘Zëri Perëndimor i Kosovës’ që kemi kërkuar një proces të drejtë, të paanshëm dhe të barabartë. Në realitet kjo Gjykatë, asnjërën nga këto nuk i ka pas. Jemi këtu edhe për të protestuar edhe është shumë e vështirë një Prokurori e tillë të bëj një skandal duke kërkuar 45 vite dënim. Kjo është edhe ofendim për drejtësinë kombëtare, për vetë Hagën për krejt këtë Gjykatë. Ne s’mund të jemi pa zë, jemi këtu për ta dëshmuar vetën, kulturën tonë, historinë dhe për ta mbrojtur atë, e cila nuk guxon për asnjë çmim të njolloset”, deklaroi avokati.
Procesi gjyqësor ndaj ish-krerëve të UÇK-së po hyn në fazën përfundimtare, ndërsa palët janë në pritje të hapave të radhës proceduralë nga trupi gjykues. /teve1.info/
Gucati nga Haga: Nuk do t’ia arrijnë qëllimin, lufta e popullit shqiptar ka qenë e shenjtë
