Në orët e vona të 18 shtatorit në këtë pompë derivatesh në Prishtinë, ndodhi një rast i rrëmbimit të një personi.
Një 42-vjeçar u rrëmbye nga disa persona duke u sulmuar dhe futur me forcë në një automjet, për t’u dërguar më pas në një fshat dhe për t’u mbajtur peng.
E pas më shumë se një muaji hetime intensive nga Policia e Kosovës, u arrit të zbulohen tetë persona si të dyshuar për këtë rast.
Në një aksion të hënën u arrestuan këta persona, ndër të cilët rezultoi se ishte i përfshirë edhe një zyrtar policor.
Inspektorati Policor i Kosovës njoftoi se kanë rekomanduar edhe suspendimin e këtij punonjësi të Policisë.
Megjithatë, nuk duket se janë të pakta rastet kur policët përfshihen në vepra të ndryshme penale.
Sipas statistikave të autoritetit mbikqyrës të Policisë, vetëm gjatë këtij viti janë bërë 87 rekomandime për suspendim dhe janë 38 policë të arrestuar.
Ish-drejtori i Policisë, Reshat Maliqi vlerëson se kjo dukuri tashmë është shqetësuese për këtë institucion.
“Bindja është se zyrtarët policorë janë qytetarë lojalë të shtetit që zbatojnë ligj dhe i ndihmojnë viktimat e jo ata ta viktimizojnë ndonjë person tjetër siç është rasti i fundit që ata të marrin pjesë në kidnapim të ndonjë personi, dmth është krejt në kundërshtim me etikën dhe misionin e vizionin e asaj që e kanë zyrtarët policorë gjatë zbatimit të ligjit”, ka thënë Mailqi.
Sipas tij, duhet mbikëqyrje më e madhe e përfshirjes së mundshme të punonjësve të Policisë në vepra të ndryshme penale.
“Në të gjitha rastet kur qytetarët apo kushdo qoftë ka një informacion për ndonjë polic që është pjesëmarrës i ndonjë vepre penale ose ka kryer vepër penale apo ka planifikuar apo ka bërë përgatitje për kryerjen e ndonjë vepre penale është mirë që me dhënë informacione dhe unë besoj se nuk i shpëton masave ndëshkuese edhe nga Inspektorati Policor edhe nga Policia por në të njëjtën kohë Prokuroria dhe Gjyqësia dhe ta merr dënimin meritor”,ka thënë tutje Maliqi
Tëvë1 ka pyetur Prokurorinë dhe Gjykatën Themelore në Prishtinë se çfarë mase është vendosur ndaj këtyre të arrestuarve por që nuk ka pasur përgjigje deri në momentin e publikimit të kronikës.
