Një zyrtar policor ka pësuar lëndime trupore, mëngjesin e së mërkurës pasi u godit nga një veturë në fshatin Banjë të Istogut.
Lajmin e ka konfirmuar zëdhënësi i Policisë së Rajonit të Pejës, Driton Rugova.
Sipas Rugovës, ngjarja ka ndodhur rreth orës 08:35, në momentin kur zyrtari policor ishte duke kryer detyrën në një pikë kontrolli.
Si pasojë e goditjes, ai ka pësuar lëndime trupore dhe është dërguar në Spitalin Rajonal të Pejës për trajtim mjekësor.
“Sot rreth orës 08:35, në fshatin Banje-Istog, ka ndodhur një aksident trafiku dhe si pasojë nga një veturë është goditur zyrtari Policor, i cili ishte në pikë kontrolli, zyrtari Policor ka pësuar lëndime trupore i njëjti është dërguar në Spitalin Rajonal në Pejë, për tretman mjekësor, ndërsa rasti është duke u hetuar nga Njësiti i trafikut Rajonal”, tha ai. /teve1.info/
