Një polic jashtë detyrës zyrtare dhe një qytetar janë gjuajtur me armë zjarri pas mesnate në fshatin Dogona në Ferizaj. Si pasojë lëndime kanë pësuar të dytë dhe kanë marrë ndihmën mjekësore.
Polica ka bërë të ditur se ka sekuestruar dy armë zjarri, 16 gëzhoja dhe një predhë dhe veturat e të përfshirëve në këtë rast.
Kanun Veseli, zëdhënës i Policisë për rajonin e Ferizajt ka thënë për teve1.info se për shkak të përfshirjes së zyrtarit policor, është njoftuar edhe Inspektorati Policor i Kosovës.
“Të plagosurit pasi kanë marrë ndihmën e parë në Qendrën Emergjente ne Ferizaj janë dërguar në QKUK për trajtim të mëtutjeshëm mjekësor dhe sipas informatave nga personeli mjekësor ndodhen jashtë rrezikut për jetë. Ndërsa janë intervistuar dy dëshmitarë që gjendeshin në njërën nga veturat”, ka thënë ai.
Veseli ka bërë të ditur se hetimet për këtë rast janë duke vazhduar në bashkëpunim me IPK-në dhe nën autorizimin të prokurorit kujdestar të krimeve të rënda.
